पीक कर्जासाठी ऑनलाईन अर्ज कसा करावा? कृषिका (Krishika) ॲपद्वारे
शेतकऱ्यांना पीक कर्ज मिळवणे अधिक सुलभ व्हावे यासाठी कृषी मंत्रालयाच्या वतीने विविध डिजिटल सुविधा उपलब्ध करून दिल्या जात आहेत. जनसमर्थ पोर्टलव्यतिरिक्त आता ‘कृषिका’ (Krishika App) या मोबाईल ॲप्लिकेशनच्या माध्यमातून शेतकरी घरबसल्या अत्यंत सोप्या पद्धतीने किसान क्रेडिट कार्ड (KCC) पीक कर्जासाठी ऑनलाईन अर्ज करू शकतात. या ॲपच्या मदतीने शेतकऱ्यांना त्यांच्या जमिनीच्या क्षेत्रानुसार आणि पिकानुसार किती कर्ज मिळू शकते, याची माहिती लगेच मिळून थेट बँकेकडे अर्ज सादर करता येतो.
अर्ज करण्यासाठी सर्वप्रथम गुगल प्ले स्टोअरवरून कृषी मंत्रालयाचे अधिकृत ‘Krishika’ ॲप्लिकेशन डाऊनलोड करावे. ॲप उघडल्यानंतर ‘Farmer Login’ हा पर्याय निवडून आपला मोबाईल नंबर, आधार क्रमांक, आधारवरील नाव आणि आधारशी लिंक असलेला मोबाईल नंबर नोंदवावा. त्यानंतर मोबाईलवर आलेला ओटीपी (OTP) टाकून व्हेरिफाय करावे. पुढे जन्मतारीख, नातेसंबंधाचा प्रकार आणि स्वतःचा सुरक्षित पासवर्ड सेट करून नोंदणी प्रक्रिया (Registration) पूर्ण करावी.
नोंदणी पूर्ण झाल्यानंतर सेट केलेल्या पासवर्डने किंवा ओटीपीने लॉगिन करून ‘KCC Loan Apply Now’ या पर्यायावर क्लिक करावे. यामध्ये जात प्रवर्ग (Category), शेतीचा मालकी प्रकार (मालक किंवा भाडेपट्टा), शेतीचा प्रकार (अल्पभूधारक/अत्याल्पभूधारक) निवडावा. त्यानंतर पत्त्यामध्ये राज्य, जिल्हा, तालुका, गाव आणि पिनकोड नोंदवावा. पुढे फायनान्शियल डिटेल्समध्ये वार्षिक उत्पन्न, स्थावर मालमत्तेचे मूल्य आणि प्राथमिक व्यवसाय (शेती, पशुपालन इ.) निवडून पुढील टप्प्यावर जावे.
पुढील भागात जमिनीचा लँड रेकॉर्ड तपशील द्यावा लागतो. यामध्ये ८-अ नुसार खाते क्रमांक, ७/१२ वरील गट/सर्व्हे क्रमांक आणि जमिनीचे क्षेत्र नोंदवावे. यानंतर शेतात घेतल्या जाणाऱ्या पिकांची निवड (उदा. सोयाबीन, कापूस, कांदा, ऊस इत्यादी) करावी. पिकाचा हंगाम (खरीप/रब्बी) आणि पाण्याचा प्रकार (जिरायती/बागायती) टाकल्यानंतर, त्या क्षेत्रानुसार शेतकरी किती पीक कर्जासाठी पात्र आहेत (Loan Eligibility) हे स्क्रीनवर आपोआप दर्शवले जाते.
पात्रतेनुसार हवी असलेली कर्जाची रक्कम टाकून ज्या बँकेकडून कर्ज घ्यायचे आहे, ती बँक आणि आपल्या जवळची बँक शाखा (Branch/IFSC Code) निवडावी. त्यानंतर ‘Preview’ वर क्लिक करून भरलेली सर्व माहिती तपासून घ्यावी. सर्व माहिती अचूक असल्यास ‘Apply’ वर क्लिक करून मोबाईलवर आलेला अंतिम ओटीपी टाकावा आणि अर्ज सबमिट करावा.
अर्ज यशस्वीरीत्या सादर झाल्यानंतर ‘Application Successfully Submitted’ असा संदेश आणि अर्ज क्रमांक प्राप्त होतो. बँकेकडून अर्जाची तपासणी झाल्यावर मंजुरीबाबत एसएमएसद्वारे कळवले जाते. यानंतर आवश्यक कागदपत्रांची पूर्तता करून बँक शाखेतून पीक कर्जाची पुढील प्रक्रिया पूर्ण करता येते.